3 قصص أطفال بالعامية عن الأمانة والإخلاص
نجد قصص أطفال بالعامية تعمل على تسهيل الفهم والاستيعاب، فالعامية هي اللغة السائدة التي يتحدث بها الناس جميعا في حياتهم اليومية، لذا فإن قراءة النصوص المكتوبة بالعامية تجعل الفهم أسهل وأسرع، ولاسيما للأطفال، وهذا يساعدنا على تقليل الحاجز بين اللغة المكتوبة واللغة المنطوقة.
وعندما يقرأ المرء منا بلغة قريبة من لغته الأم، فإنه يكون قادرا على ربط الكلمات والمفاهيم بالواقع الذي يعيشه بسهولة، مما يعزز الاستيعاب العميق لديه لكل ما يقرأ.
أولا/ حكاية النجار واللوح الخشب:
كان يا ما كان..
كان فيه نجار شاب لسه في مقتبل عمره، ورث الصنعة عن أبوه الله يرحمه، ورشته كانت صغيرة في طرف المدينة، وعلى أد ما كان إيديه تتلف في حرير وشغله مية مية، بس رزقه كان يادوب ممشي يومه بالعافية، وبيكفي مصاريف بيته وعلاج أمه العيانة.
وفي يوم من الأيام..
دخل عليه تاجر كبير من أعيان البلد، طلب منه يفصل له خزنة خشب مخصوصة عشان يشيل فيها أوراقه وفلوسه، والتاجر اداله لوح خشب قديم وتقيل وقاله: “أنا عايزك تعملي واجهة الخزنة من الخشبة دي بالذات، دي ورث غالي عندي من ريحة جدي”.
النجار سمّى الله وبدأ شغل..
وهو بيحط الخشب تحت المنشار عشان يفصله، حتة من طرف اللوح طقت واتكسرت، وفجأة لقى حاجة بتكر وبتقع من قلب الخشب.. حبات لؤلؤ حر كبيرة ونادرة، كانت متخبية بذكاء جوه تجويف في الخشب من سنين السنين.
النجار اتسمر مكانه من المفاجأة..
تمن لؤلؤة واحدة بس كفيل يعالج أمه عند أحسن دكاترة، ويوسع ورشته ويعيشه ملك بقية عمره، الشيطان لعب في دماغه لحظة وقال له: “يا عم.. التاجر مايعرفش حاجة عن الكنز ده، هو فاكره حتة خشب قديمة، وده رزق جالك من السما عشان يفك ضيقتك”.
بس بسرعة استغفر ربه..
وافتكر كلمة أبوه اللي كان دايمًا يقولهاله: “يا ابني اللي عند ربنا ما يجيش بمعصية، والقرش الحرام بياخد الحلال ويمشي”.
لم اللؤلؤ بحرص وحطه في صرة قماش، وكمل شغله في الخزنة وطلعها تحفة فنية.
يوم التسليم..
التاجر جه يستلم الخزنة وانبهر بجمالها ودقتها، قام النجار مطلع صرة القماش ومد إيده بيها للتاجر وقاله: “يا بيه، وأنا بشق الخشب لقيت الأمانة دي جواه، ولولا إني شقيته ماكانتش بانت، دي حاجتك وحقك يرجعلك”.
التاجر بص للؤلؤ ودموع في عينه نزلت..
بص للشاب وقاله: “يا ابني الخشبة دي كانت بتاعة جدي، وكان دايماً يحكي عن كنز مخبيه فيها للزمن، وإحنا دورنا كتير ويئسنا وقلنا دي خرافات.. أنا اديتك الخشب عشان أختبر شطارتك، بس إنت رجعتلي اللي أغلى من المال.. إنت رجعتلي الثقة في ولاد الأصول”.
حلف التاجر ما ياخد اللؤلؤ لوحده..
وأصر يدي النجار نصه مكافأة لأمانته، والنص التاني عمل بيه أكبر معرض موبيليا في المدينة وشارك فيه النجار الشاب، وكده الأمانة فتحت للنجار أبواب رزق واسعة، عمره ما كان هيشوفها لو كان مد إيده للحرام.
اقرأ مزيدا من قصص أطفال بالعامية من خلال: قصص أطفال بالعامية أفضل قصص قبل النوم على الإطلاق
ثانياً/ حكاية الراعي والصرة اللي نسيها صاحبها:
كان يا ما كان..
كان فيه راعي غنم عايش في صحرا بعيدة، الراجل ده كان حاله على قده خالص، مايملكش من الدنيا غير عصايته وشوية خرفان بيرعاهم لأهل القرية بملاليم، ورغم فقره الشديد ده، كان معروف إن قلبه راضي ونفسه عزيزة، عمره ما بص للي في إيد غيره.
وفي يوم من الأيام..
نزل عند بير ميه عشان يسقي غنمه، لقى راجل غريب شكله عليه العز والهيبة، مميّل جمله وقاعد يستريح. الراعي سقى غنمه، وبعدين سقى الراجل الغريب وقدم له شوية تمر ولبن كان شايلهم لغداه هو، وبعدها ساب الراجل يكمل راحته ومشي هو يشوف شغله.
بعد ما الراعي مشي مسافة..
لمح حاجة بتلمع مطرح ما الراجل كان قاعد، رجع تاني لقى صرة تقيلة من جلد غالي، فتحها لقاها مليانة مجوهرات ودهب، كفاية إنها تخليه أغنى واحد في زمانه.
الراعي بص يمين وشمال ملقاش حد..
الشيطان وزه شوية ونفسه قالت له: “ده رزق ربنا بعتهولك عشان ترتاح من شقا الرعي والبهدلة دي”، بس فيه صوت جواه صرخ فيه وقال: “ازاي يهنالك عيش بفلوس مش بتاعتك؟! دي أمانة ولازم ترجع لصاحبها”.
طلع الراعي يجري..
بأقصى سرعة ورا أثر جمل الراجل الغريب، وفضل يجري في عز الشمس والحر لحد ما نفسه اتقطع، وفضل مكمل لحد ما شاف عفار الجمل من بعيد، قعد يشاور بعصايته ويصرخ بأعلى صوته لحد ما الراجل انتبه له ووقف.
وصل الراعي وهو “بينهج”.. والعرق بيشر من جبينه، ومد إيده بالصرة وقال له: “يا أخينا، إنت نسيت دي عند البير، وخفت تبعد ومقدرش ألحقك.. خد أمانتك أهي”.
الراجل الغني بص للراعي وهو مصدوم..
وبعدين بص للصرة وقال له بهدوء غريب: “هو إنت مافتحتهاش شوفت إيه اللي فيها؟!”.
رد عليه الراعي وقال: “أنا شوفت لمعة اللي فيها، بس خوفي من ربنا كان نوره أقوى في قلبي”.
هنا الراجل الغني ضحك ضحكة واسعة وقال له:
“يا ابني أنا مانستهاش، أنا سيبتها قاصد! أنا تاجر بلف البلاد ببحث عن راجل أمين يشاركني ويدير مالي، واختبرت قبلك كتير ونفوسهم ضعفت وخانت الأمانة، بس إنت الوحيد اللي نجحت في الاختبار”.
اقرأ مزيدا من قصص أطفال بالعامية من خلال: قصص أطفال بالعامية pdf بعنوان الفلاح الأمين والمالك البخيل غاية في الروعة
