قصص مضحكة

قصص زوجات مضحكة بالعامية المخبر فوزية

قصص مصرية ساخرة

وإن سافرت العالم أجمع وزرته من الشمال إلى الجنوب ومن غربة إلى شرقة فلن تجد أكثر خفة دم من المصريين ومواقفهم التي تجعلك تضحك من قلبك ، يتصرفون بتلقائية شديدة يحاولون تقليد أي شيء ، يحاولون اصلاح كل شيء ، يعملون أكثر من وظيفة في وقت واحد فلهم القدرة الفائقة على ابتكار الأساليب الجديدة ، والحيل ، فالنساء المصريات من اخف خفة دم ، واكثرر النساء ذكاء ، تفعل كل شيء وأي شيء أيضا لتحافظ على زوجها حتى لا ينظر لأخرى حتى لو خلعت عينيه أو قتلته لا يهم المهم ألا يرى أنثى غيرها بالكون ، ونستكمل مع برنامج نصائح زوجية والمذيعة المفترية والمذيع مجدي توفيق قصة المخبر فوزية في قصص زوجات مصرية مضحكة جدا وساخرة.

 

 المخبر فوزية

وهنا ابتسم المذيع مجدي قائلا :
– لا يا مدام ناني مش حضرتك اللي قتلته فكرة مراته التانية معاكي حق والله وانتم يا رجاله عاوزين تقروا مجلات عن تعدد الزوجات وتعملوا ناصحيين اتنيلوا اقروها في الشغل ، مش لازم يعني في البيت متجبوش لنفسكم مصيبة يلا الله يرحمك يا جوز مدام ناني ونسيب ناني البسكوته ، اللي كانت بتقتل الفكرة ومكنش قصدها تقتل الغلبان جوزها ونروح للقصة الرابعة والمخبر فوزية اللي اكتشفنا انها كانت بتشتغل مخبر سري للموساد الاسرائيلي مش عارفين اسرئيل مش هتسينا في حالنا وبيتجسسوا علينا ليه وعلى بيوتنا وكمان بيزرعوا مخبرين سرين بس مش هنقول تفاصيل علشان الشوشرة انتم عارفني ، مبحبش الكلام الكتير والفرقعات الصحفية اللي من النوع دا دي هنخدلها حلقة لوحدها نتكلم بالتفاصيل والادله انتم عارفني مبتكلمش وخلاص ، اياكم حد يغير القناة ولا يطفي التلفزيون انتم احرار هعمل فيكم زي مدام ناني معملت في جوزها …م

جدي توفيق من قناة احنا الاصل والباقي تقليد .

القصة الأخيرة ” المخبر فوزية “

– عاوزك تقوليلي قتلتي جوزك ليه يا فوزية وحدفتيه من بير السلم الجيران شافوكي وانتي بتحدفيه؟
– مقتلتهوش يا باشا مقتلتهوش صدقني انا هقتل حمودي حبيبي دانا كنت بنفذ كلام المذيعة
بتاعة التلفزيوون بتاعة برنامج نصائح زوجية ، بتشوفه يا باشا
– لا يا فوزية مبحبش التلفزيون ، كلام المذيعة اللي هو ايه يا فوزية؟
– هي قالت لازم تدفعي جوزك بقوة للامام علشان ينجح في شغلة ويبقى راجل ناجح…
– ها وبعدين ؟
– بس يا باشا وهو نازل رايح الشغل بدري صحيت على غير عادتي والله يا باشا وكان واقف على اول السلم وانا دفعته بكل قوتي وعزمي زي مقالت المذيعة علشان ينجح في شغلة يبقى انا غلطانة يا باشا ودا جزائي انا كنت بدفعه للامام علشان يبقى ناجح بس هو عمره خلص لغاية كدة راجل وش فقر طول عمره فاشل يبقى ازاي قتلت حمودي حبيبي؟
– عندك حق يا فوزية عمره خلص ورجل فقري انه اتجوزك …


وهنا قال مجدي منفعلا:
– غلطانه يا فوزية كنتي حدفتية من فوق السطح كان هيتحدف بقوة اكبر الله يرحمك يا صول فتحي والله كان ابن حلال هنسيب فوزيه وقصة اتفقها مع الموساد الاسرائيلي دلوقتي علشان البلبة والضجة احنا مش بتوع كلام كتير وقنتنا دايما بتقول الحقايق وكله بالادله يا سادة بس خلينا الاسبوع الجاي على قناة ” احنا الاصل والباقي تقليد “


ودلوقتي بعد مشفنا معكم الاربع قصص لفوزية وزكيه وناني والكابتن تهاني واللي كلهم كانوا بينفذوا نصيحة وكلام مذيعة برنامج نصائح زوجية يسعدنا ان مذيعة البرنامج بنفسها هتكون معانا النهاردة علشان تعرفنا ازاي نتعامل مع المرأة ونتقي شرها وكفاية اللي ماتوا مننا احنا كدة هننقرض يا جدعان انتظرونا بعد الفاصل واوعوا حد يغير القناة هعرفك يااللي هتغير القناة ومش هسيبك ..هجيبك من هدومك …مجدي توفيق …

” نهاية الحلقة ”

– وعدنالكم تاني اعزائي المشاهدين ومفاجأة الليلة ومعانا المذيعة الجميلة الصاروخ القنبلة مقدمة برنامج نصائح زوجية ” مهيتاب ” اهلابيكي يا ماهيتاب منورنا ايه الحلاوة دي يا ماهي …
– اهلا بيك يا مجدي البرنامج منور بيك يا اخويا انت وكل اللي في الاستوديون والمشاهدين حتى الناس اللي غيروا القناة وراحوا يتفرجوا على القناة بتاعتي قناة ” جوزك على متعوديه ” كل منور يا مجدي
– مهيتاب عاوز اعرف منك ليه حوادث القتل الكتير اللي بتحصل الايام دي بسبب برنامجك نصائح زوجية وليه الستات بتفهمها غلط


– ودي حاجة وحشة يا مجدي ادينا بنعمل خدمة للحكومة والبلد
– خدمة للحكومة ازاي يا ماهيتاب مش فاهم فهميني كدة بالراحة
– بص يا مجدي لما جريمة قتل بتحصل مش كدة بنقلل من الكثافة السكانية وبنخف الزحمة من البلد اللي الواحد مبقاش عارف يمشي فيها الشوارع يا مجدي بقيت زحمة اوووى وخانقة والحكومة زهقت ومش لاقية فلوس تصرف عليهم اهو احنا بنقدم خدمة للمجتمع ولمصر كلها وبنقلل الكثافة
– وهو يا مهيتاب علشان نخف الزحمة لازم كل المقتولين يكونوا رجاله ليه مفيش ستات ماتت لحد دلوقتي من برنامجك؟


– يووة يا مجدي انت هتقر يا اخويا هو حظهم كدة وبعيدن دا قضاء وقدر هنعترض على حكمة ربنا ولا ايه يا مجدي انت رجل مؤمن ؟
– لا لا مش هنعترض يا مهيتاب على حكمة ربنا ابدا عندك حق بردوا ونظرية
طيب كلميني يا مهيتاب عن المرأة وازاي الرجل يتقي شرها ويتعامل معاها ازاي علشان احنا زهقنا بجد ومش عارفين نعملكم ايه يا ستات علشان نرضيكم ونتقي شركم الصراحة ؟
– انت يا مجدي عاوزني اتكلم عن المرأة كدة بالساهل دانت محتاج كتب ومراجع ولغرتمات يا حبيبي علشان تعرف تتعامل معاها وهي بتفكر ازاي ومحدش يتوقعها ابدا؟
– ليه يعني محدش يتوقعها هي جاكي شان ولا ايه يا ستي
– اهو احنا كدة زي جاكي شان موتوا بغيظكم يا مجدي
– طيب مدام الست محدش يتوقعها والرجل يبقى ايه يا مهيتاب
– هههههههههه الرجل دا عبارة عن صفحة في كراسة عيل صغير بيتعلم الكتابة تقدر تقراها بسهولة وهو الرجل عاوز اية غير اكلة حلوة وكلمة حلوة وشوية دلع وحنان وحنية يا مجدييييي
– طيب لو الرجل عمل كدة للست هيقدر يفهمها ويتقي شرها يا مهيتاب ونرتاح كلنا ؟


– يا نهار ابيض انت اتجننت ولا ايه انت عارف يا مجدي لو الرجل عمل كدة مع مراته ايه اللي هيحصل اوعوا يا رجاله تعملوا كدة دا عاوز يوديكم ورا الشمس
– اوديهم ورا الشمس ليه بس ايه اللي هيحصل يا ستي اكيد هتفرح
– تفرح ايه بس الله يسامحك يا مجدي علطول مراته هتشغل قرون الاستشعار وهتشك فيه انه يعرف واحدة غيرها وبيخونها وهو في رجل هيدلع مراته يا اخويا اليومين دول الا لو كان رجل شمال
– مهيتاب انتي بتتبعي النصايح اللي بتقوليها للستات مع جوزك


– ايوة يا مجدي كنت بتبعها كلها قبل مطلق
– تطلقي يعني انتي مطلقة يا مهيتاب
– لا يا مجدي بعد الشر مطلقة ايه مين قال كدة يا اخويا انا ارملة بس
– ارملة ازاي انتى لسه بتقولي مطلقة
– يو يا مجدي هحكيلك الموضوع المرحوم الله يرحمة طلقني وهو رايح للمؤذون مات فملحقش يعملها يا خويا ويطلقني
– ومات ازاي غريبة وهو رايح يطلقك يتوكل على الله كدة غريبة اووى وصدفه عجيبة الصراحة 


– بص يا مجدي يا اخويا انت مش غريب بردوا اليوم المشؤم دا طلقني بالتلاته ونزل رايح للمؤذون وقعت عليه انبوبة بوتجاز على دماغة وهو معدي تحت العمارة فمات قضاء وقدر واتوكل على الله هنعترض على حكمة ربنا
– يا ساتر يارب قضاء وقدر وانبوبة بوتجاز لا احكيلي يا ماهي ومين اللي حدفها عليه
– والله يا مجدي محدش عارف لغاية انهاردة اصلهم ملقيوش بصمات على الانبوبة خالص هي شكلها كانت واحدة بتطبخ ولا حاجة ونسيت الانبوبة على الصور فوقعت ربنا يسمحها بقى حرمتنى من عبود حبيبي
– بتطبخ على صور البلكونه يا ماهي في البلكونة
– يا خويا هتعترض على حكمة ربنا الله يرحمة المرحوم كان ابن حلال مصفي زيك كدة يا مجدي بالظبط
– الله يرحمة ارتاح والله 


– بتقول حاجة يا مجدي
– لا لا يا ماهي بس في نهاية الحلقة تحبي تنصحي الستات بايه علشان يعيشوا سعدا مع اجوازهم
– انا بنصح كل ست دخلت غاز وعندها انبوبة بوتجاز في البلكونة تروح دلوقتي تغسلها غسلة حلوة وتمسكها بجوانتي وتحطها في البكونة بعد متغطيها بحته قماش وبلاش لمس بالصوابع يا ستات البصمات بتظهر وخليكي زكيه واوعي يا اختى انتى وهي من العيال ولعبهم اياكي يمسكوا الانبوبة وخليها عندك يا ست انتى وهية وهتحتاجيها وقت عوزة وتابعوني على برنامج نصائح زوجية وهقولك تعملي ايه بالانبوبة بالظبط
– وانا بنصح كل راجل لو دخلت غاز وعندك انبوبة فاضية في البلكونة او أي حاجة تقيلة روح بيعها بسرعة واياك تعدي من تحت البلكونة او تركن عربيتك تحت البلكونه اركنها بعيد وامشي بعيد واجري في الشارع اجري العمر مش بعزقة يا رجاله
– كدة بردوا يا مجدي هتقطع علينا هههههههههه.

مني حارس

طبيبة بيطرية وكاتبة وعضو اتحاد كتاب مصر اهم الاصدارات رواية لعنة الضريح- قرين الظلام- متجر العجائز- قسم سليمان- لعنة الارواح- جحيم الأشباح - نحن نعرف ما يخيفك - ساديم - رسائل من الجحيم - المبروكة - مقبرة جلعاد - ابنة سراحديل- رعب التجربة الأمريكية - سجلات عزازيل- جمعية قتل الرجال - رحيل- الأرملة السوداء- اللعنة - قلادة الجحيم- عدلات وحرامي اللحاف - كيف تعتني بحيوانك الأليف

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى