الكابتن تهاني قصص زوجات مضحكة جدا

ونستكمل مع المذيع مجدي توفيق ، من قناة ” احنا الأصل والباقي تقليد ” قصص النساء الأربعة التي قتلن ازواجهن نتيجة سماعهن وتنفيذهن لنصائح برنامج نصائح زوجية الشهير ، الذي يعطي التعليمات كيف تحافظين على زوجك وتجذبينة إليك بطرق سهلة ومضمونة ، وتحدثنا من قبل عن زكية وكيف كانت تضع لزوجها الحديد بالطعام وابتلعت هي المغناطيس ، واليوم نشاهد الكابتن تهاني مدربة كمال الاجسام ماذا فعلت عندما نعها زوجها من مشاهدة المسلسل التركي في قصة مضحكة جدا وخفيفية بلهجة مصرية في موقع قصص واقعية الكابتن تهاني وبرنامج نصائح زوجية

الكابتن تهاني وبرنامج نصائح زوجية

وهنا ضحك المذيع قائلا :
– لا لا يا زكية مش غلطانه ابدا حد يقدر يقول كدة الله يرحم جوزها المسكين معرفوش يخرجوا بردة الحديد من بطنه ونشوف القصة التانية ومعانا الكابتن تهاني ، مدربة كمال الاجسام حاصلة على المديلة الذهبية في الالموبيات انتظرونا بعد الفاصل واوعوا حد يغير القناة هجيبك من وسط مليون ياللي هتطفي التلفزيون ، معاكم مجدي توفيق من قناة ” احنا الاصل والباقي تقليد “.

– ليه كدة بس يا كابتن تهاني مقولنا نخف شوية على الرجل دي حالته وحشة اووي الدكتور بيقول كسر في العمود الفقري وشرخ في الجمجمة وركبولة خمس شرايح غير 6 مسامير واحتمال كبير يجيلوا شلل رباعي بس لسة مش متأكدين لما يفوق من الغيبوبة الاول ؟

– هو اللي عصبني يا كابتن ظريف انت عارف اني كيوت ويعني ايه يجيله شلل رباعي واتمرن علي مين يا كابتن في البيت دلوقتي دا تهريج والله ؟
– يا كابتن تهاني مش كدة هدي اعصابك قولنا العصبية دي مش كويسه لصحتك واحنا عندنا بطوله الاسبوع الجاي احكيلي ايه اللي حصل وعملتي كدة ليه في المسكين الله يرحمه ؟
– هو مات يا كابتن ظريف ولا ايه طمني ؟

– لا لسه شوية بس معتقدش هيكمل يا كابتن تهاني الاسبوع دا الدكترة فاكرين خبطة بلدوزر
– بص يا كابتن ظريف انا كنت قاعدة بتفرج على المسلسل الرومانسي التركي اللي متبعاه ودي الحلقة 5 الألف وكانوا خلاص هيكتشفوا مين اللي قتل مهند ؟
– مسلسل رومانسي ومين اللي قتل مهند ماشي يا كابتن وبعدين ؟

– جه الاستاذ من برا بسلامته متأخر ومعرفش كان فين طول النهار وكنت محضراله الغدا على السفرة من تلت ساعات والاكل برد والبيه عاوز الاكل سخن ..اهو اكل الاكل سخن ؟
– وبعدين يا كابتن عملتي ايه ؟
– انا سكت يا كابتن ومردش اتكلم واقله انت اتأخرت ليه وكنت فين مكنتش عاوزة ازعاج ونكد وقت المسلسل اللي بحبه علشان محدش يقول اني ست نكدية وبتخانق على الفاضية والمليانة ؟

– لا عين العقل يا كابتن تهاني والله …طول عمرك ست كمل وعقلة
– لكن البيه مصر اسخن الاكل وكمان يحاول يزعجني وانا اقله بلاش يا حسين اتقي شري يا حسين لكن المصيبة توصل بيه الجراءة انه يحاول يقفل التلفزيون وانا بتفرج على المسلسل هنا بقى عملت بنصيحة المذيعة في برنامج ” نصائح زوجيه ” اللي بيجي في التلفزيون بتتفرج عليه يا كابتن ظريف ؟

– لا مبشفهوش وهي ايه النصيحة دي يا كابتن ؟
– اني لازم ابعد عن اي حاجة يتزعجني واتخلص منها وقت البريك بتاعي وانا بعمل الحاجة اللي بحبها بعد تعب ومجهود يوم طويل علشان استعيد نشاطي واجدد حيويتي يا كابتن انت عارف اننا الستات غلابة ومظلومين في البلد دي ومش اخدين حقنا .

– لا واضح يا كابتن تهاني ..
– بتقول حاجة يا كابتن ظريف كنت عاوزة اجرب الضربة القاضية 2 ومش لاقيه حد وجوزي في الانعاش
– لا..لا.. ابدا بقول والله مذيعة بتفهم وعندها حق مظلومين مظلومين حد يقدر يقول غير كدة وعملتي ايه يا كابتن
– انا كنت بتفرج على المسلسل التركي اللي بحبه وكانوا خلاص هيعرفوا مين اللي قتل مهند هو اللي عصبني وقولتله بلاش يا حسين ابعد عني السعادي يا حسين اتقي شري يا حسين …لكن هو السبب؟؟
– حصل ايه ونيل ايه حسين ؟

– والله يا كابتن مدرتش بفسى غير وانا بضربة الضربة القاضية 3 واتخلصت من الشيء اللي كان بيزعجني وبعدها الجيران اتصلوا بالاسعاف جت اخدته يستاهل ولا ميستهلش يا كابتن ظريف دا حتى مخلنيش اعرف مين اللي قتل مهند اه يا ني يا مرارتي ؟

وهنا ابتسم المذيع مجدي قائلا:
– لا تستاهل يا حسين اللي جرالك الا مهند يا رجل دا كلام وفي حد يا عم حسين بيتجوز مدربة كمال اجسام يا رجل دانت لو اتخانقت معاها هتديك بالبوكس في وشك هطيرك ، والاخر كمان محدش عارف مين اللي قتل مهند يا كابتن لا عندك حق الصراحة تعملي فيه اكتر من كدة ونسيب الكابتن تهاني ومهند ونروح للقصة التالته
مع الرقيقة صاحبة الاصابع الطويلة مع دلوعة المجتمع مع مدام ناني انتظرونا بعد الفاصل واوعوا تغيروا القناة انا عارفك كويس ياللي غيرت القناة وهوصلك في بيتك وهجيبك من وسط عيالك ، راجع نفسك ورجع القناة ، انتم عرفني كويس معاكم مجدي توفيق من قناة “احنا الاصل والباقي تقليد ”
انتظرونا بعد الفاصل