قصة لم يكن الاخير

الحلقة الخامسة من قصة: لم يكن الأخير

الحلقة الخامسة من قصة: لم يكن الأخير

الحلقة الخامسة من قصة: لم يكن الأخير
الحلقة الخامسة من قصة: لم يكن الأخير

يوم العيد ميلاد علياء اخدت ليلى وراحو يشتروا فستان وكمان للكوافير زى ما وعدتها
علياء: ايه رايك فى ده
ليلى :بس ده كت
علياء:خديه جربيه هيكون حلو عليكى
ليلى تمسك الفستان:لالالالالا بلاش
علياء:ده عيد ميلاد هتزعلينى يعنى وبعدين اللون الاحمر هيطلع حلو عليكى بدل الغامق اللى انتى عايشه فيه ده
ليلى :بس انا مش ممكن اللبس ده
علياء:خلاص ده قرار هتلبسيه بس ورينى عليكى هيبقى ازاى
ليلى تقيس الفستان
علياء:ايه الحلاوه دى كلها هو عيد ميلادك ولا عيد ميلادي
ليلى:بجد حلو انا حاسه انى شبه الطمطمايه
علياء:طمطمايه ؟! ايه التشبيهات الغربيه دى
ليلى:يعنى حلو
علياء: والله جميل جدا حتى اسالى البنت دى ….ايه رايك فى الفستان عليها (تسال بنت واقف بتشترى من المحل)
البنت :حلو قوى عليكى
علياء:صدقتينى يلا بقى غيرى ورانا حاجات كثير
تدخل المحل ريم صاحبت علياء وليلى
ريم: ايه ده انتو بتعملو ايه هنا
علياء: كويس انك جيتى قولى لليلى رايك فى الفستان
ريم : ورينى كده …لفى …..يعنى كويس انتى هتحضرى بيه الحفله النهارده
ليلى: ايو بس شكله مش عاجبك
ريم :لا …يعنى بس اصله مبينك تخينه شويا
علياء: ازى ده حلو جدا عليها
ريم: يمكن بس ده رائي ….علياء انا كنت عاوزكى فى موضوع
علياء: موضوع ايه
ريم : لا تعالى نتكلم لوحدنا
ليلى: طيب انا هغير هدومي
علياء: تمام ولما تخلصى بصى فى المحل تانى لو فى حاجه لفتت نظرك على ما أجى
علياء وريم خرجو يتمشو بره المحل
ريم : انا كنت عاوزه اسالك ايه اللى بينك وبين إياد
علياء: وده يخصك فى ايه
ريم:انتو صحيح بتحبو بعض .!
علياء:انا عاوزه اعرف انتى مالك
ريم:يعنى اصلى استغربت ازى فى يوم يكون كل الجامعه بتتكلم عن إياد وليلى وبعد يوم تدخلى انتى وهو ايديكم فى ايد بعض الجامعه
علياء: محدش قالك قبل كده انك حشريه جدا
ريم: انتى اضايقتى ليه انا بستفسر بس
علياء: الموضوع مايخصكيش خالص ….بس انال هقولك علشان انا مابعملش حاجه غلط …ايو انا وإياد بنحب بعض
ريم: طب وليلى
علياء: انا مش عارفه انتي بتدخلى نفسك فى حوار انتى ملكيش فيه ليه
ريم :عادى احنا زمايل وبطمن عليكم
علياء:لا اطمنى ….ونصيحه منى خليكى فى حياتك وسيبى كل واحد فى حياته
ريم : ونصيحه ليكى انتى كمان خدى بالك من إياد …ده صاحب مصطفى وانتى ماتعرفيش يعنى ايه مصطفى
(علياء مشيت وسابت البنت
فى الوقت ده كانت ليلى طلعت من البروفه واول لما طلعت قابلت فيروز )
ليلى: ازيك ياطنط
فيروز تمام …ازيك ياعسل …ليلى مش كده
ليلى:ايو
فيروز : امال فين علياء
ليلى: هى هنا بس طلعت تعمل حاجه وجايه ….صحه حضرتك عامله ايه فى تحسن مع الدواء وكده
فيروز :انا تمام بس دواء ايه؟
ليلى: هو إياد كان قال لنا على الرحله العلاجيه اللى حضرتك لسه جايه منها و….الظاهر ان حاضرتك مش حابه حد يعرف انا اسفه ….بس هو إياد والله ماكانش عاوز يقول احنا اللى الحينا عليه
فيروز :لا عادى انا بس عاوز اعرف هو قالكم ايه بالضبط
ليلى: هو احنا لما سألناه انتى مكنتش بتحضر ليه حكى لنا لما كان بياخد باله من حضرتك وانتى تعبانه وانه استغل فرص ان حضرتك مسافرة للدكتور يعني وقال انه لازم يعملك مفاجئه انك تلاقيه قدر يحصل اللى فاتو فى الدراسه …..إياد بيحبك جدا ياطنط
فيروز(شكلها اتغير):اه فعلا ….وانا كمان
ليلى : ربنا يخليكم لبعض
علياء: هاى ازيك ياطنط
فيروز : انا تمام وانتى
علياء:تمام ..انا جايه من بعيد عماله اقول هيا ولا مش هيا
فيروز :انا هستأذن علشان تعبانه شويه
علياء: مالك ياطنط ..حاسه بايه …اوديكى للدكتور
فيروز :لا ده شوية صداع
علياء: طيب اطلب لك إياد؟
فيروز :لا العربيه والسواق بره
علياء:طيب انا هوصلك
فيروز : مفيش داعى
علياء:لا لازم(تتطلع معها توصلها)
فيروز :انا مبسوط جدا ان إياد بيحب بنت زى العسل زيك
علياء(مكسوفه):شكرا …النهارده حفله عيد ميلادي لو ممكن تجى تحتفلى معانا بيه
فيروز :كل سنه وانتى طبيه …بس معلش انا مش هقدر اصلى مشغوله جدا
علياء: خساره كان نفسى تيجى
فيروز :ان شاء الله قريب جدا….انا عازماكى انتى وإياد نتغدى سوا مره
فيروز وصلت العربيه وسلمت على علياء ومشيت
علياء رجعت لليلى وعلياء اختارت فستان حلو جدا واشترو هما الاتنين الفساتين وراحو على الكوافير وبعدين روحو البيت علشان يجهزو
باليل فى العيد ميلاد كل الناس جت ومستنين علياء وليلى كانو حلوين جدا
احسان: كل سنه وانتى طيبه ياحياتى
علياء: وانت طيب يا احلى اب فى الدنيا…انا عاوز اعرفك على اصحابى فى الجامعه…دى ليلى
احسان: سمعت عنك كتير ..اتشرفت بمعرفتك
علياء: وده يوسف
احسان :اهلا اتشرفت بيك
علياء:وده بقى إياد
احسان : اهلا وسهلا
علياء:ولسه فاضل مصطفى بس ديما بيتاخر
• علياء بتسلم على الناس اللى فى الحفله وليلى وقفه مع يوسف و إياد قعد يتكلم مع احسان بيه
مصطفى ديما اخر الواصلين …لما دخل الحفله شاف إياد واقف مع احسان رح عنده
مصطفى :هاى
إياد: ديما متاخر كده ….ده بقى مصطفى باشا
احسان: اهلا انت برضو زميل علياء فى الكليه
مصطفى:ايوه …طيب فين علياء علشان اقولها كل سنه وهيا طيبه
احسان :هتلاقيها بتسلم على الناس
إياد:بعد اذنك هاخده يسلم على علياء
احسان : اتفضلو
إياد ومصطفى بيدورا فى الحفله على علياء
مصطفى :مش ده يوسف برضو …يوسف ازيك
يوسف :تمام …ايه فينك مش بتيجى الكليه مع إياد ليه
مصطفى:انت فاكرنى مجنون زيوه
يوسف :مش هتتغير ابدا
إياد:ليلى فين علياء
ليلى :معرفش كانت هنا من شويا
مصطفى : انتى ليلى مش ممكن …دى طلعت بنت ههههه
ليلى:انا صحيح متانقه النهارده بس لسانى جبته معايا
مصطفى:لا كده يبقى انتى ..اكيد الكوافير تعب جدا علشان يوصلك للحاله دى
إياد:وبعدين انتو هتتخانقو هنا كمان
علياء: ايه مبسوطين ياجماعه
مصطفى: بس الميوزك مش حلوه شويه
علياء: مصطفى ديما معترض هههههه
إياد: انا عاوزك شويه ياعلياء
• إياد قال لعلياء انه عاوز يعرف بابها انه بيحبها وانه مافيش وقت احسن من دلوقتى وراحو هم الاتنين يقول له و احسان قال لهم انه مش هيعرف يرد عليهم فى الموضوع ده دلوقتى
• كل الناس اللى فى الحفله استمتعو جدا ولما خلصت الحفله
إياد: ليلى يلا علشان اوصلك فى طريقنا
ليلى: اوك ماشى هجيب شنطتى
مصطفى :وانا هسبقك على اليخت
إياد:اوك
علياء: اليخت انتو لسه هتكملو السهره
إياد: من زمان ماقعدناش مع بعض انا هبات هناك النهارده
علياء:اوك ماشى
إياد:بحبك
علياء: وانا كمان
إياد:وانتى كمان ايه .هو انا عمرى ماهسمعها خالص
علياء(مكسوفه): خلاص بقى انت عارف
إياد:لا انا مش همشى لا لما اسمعها
علياء:إياد خلاص بقى بابا بينادى
إياد يمسك ايد علياء:مش هتمشى لا لما تقولى
علياء(بصوت منخفض): انا كمان بحبك
إياد: ايه لا انا مسمعتش ماتتحسبش
علياء: بحبك
إياد: اخيرا
ليلى : انا جهزت
إياد: اوك يلا بينا…تصبحى على خير ياحبيبتى
علياء: وانت من اهل الخير ….اطلبنى لما توصل
إياد وصل علياء المدينه وبعدين راح عند مصطفى
فى اليخت
مصطفى : كان يوم حلو الواحد شاف ناس ماشفهمش من زماااااااااان
إياد: اه
مصطفى:اه ايه انت مكنتش معانا اصلا طول الوقت مع علياء وبابا علياء
إياد: انت بتغير منى ولا من علياء يابومبو
مصطفى : اغير ايه ياهبل انت …انا بس مش حاسس انك صاحبى اللى انا عارفه
إياد: فى دى انت معاك حق ..علياء غيرتنى خالص بقيت بحب الدراسه وعاوز اخلص الجامعه و اشتغل واحقق نفسى …بقيت بخطط لقدام و بحلم بانى افضل معاها على طول ويبقى عندى اولاد و..
مصطفى: ايه ايه انت سرحت بعيد جدا بس انت خلص الكليه وبعدين يبقى احلم
إياد:انا ماكنتش فاكر انى ممكن احب حد كده…انا فعلا بحبها جدا
مصطفى:احنا هنفضل طول الليل نتكلم عن علياء ……لا انا هقوم انام احسن
إياد:خلاص هحاول اغير الموضوع…..بس اصل الوقت اتاخر وانا رايح الكليه الصبح
مصطفى: الليله باظت ..مش قولتلك انت اتغيرت
إياد: تصبح على خير يامصطفى
مصطفى: وانت من اهله
• فى نفس الوقت فى بيت علياء فى اوضتها …احسان على الباب
احسان: اميرتى لسه صاحيه
علياء: صاحيه اتفضل يابابا
احسان : انا كنت عاوز اسالك عن التصريح الكبير اللى سمعته النهارده
علياء: انا بصراحه مكنتش هعرف انام الا لما اكلمك فى الموضوع ده..انا عارفه انك كانت عاوز تعرف مني انا الاول مش من إياد
احسان: انا سامعك اهو وعاوز اعرف اصل الموضوع
علياء:إياد ده زميلى فى الجامعه وهو..
احسان :انا عرفت كل حاجه عن إياد انا عاوز اعرف ايه احساس بنتى انا
علياء:بصراحه إياد شخص طيب ويتحب
احسان: يعنى انتى بتحبيه
علياء(مكسوفه):ايو يابابا
احسان :شكله ولد كويس وانا كمان حبيتو
علياء: بجد يابابا
احسان: انتى مالك مبسوطه قوى كده ….شكلك بتحبيه جدا..قولى له انى موافق انه يدخل العيله
علياء (تبتسم): شكرا يابابا
احسان :تصبحى على خير
علياء:وانت من اهل الخير
• علياء فكرت تتصل بإياد وبعدين قالت لنفسها اكيد هو مشغول مع مصطفى هابقى اكلمه الصبح
فى الصباح علياء اتصلت بإياد بس هو ماردش ..قالت لنفسها احسن اعمل له مفاجئه واروح عنده
اما إياد اللى كان نايم فصحي على صوت بنت بتنادى
سهر:مصطفى ….مصطفى(تدخل وتجد إياد)
إياد: مصطفى جوا
سهر:إياد ازيك وحشتنى جدا… فينك من زمان
إياد:يعنى كنت مشغول شويا….مصطفى جوا ادخلى له
سهر :لا خليه نايم انا هقعد معاك على مايصحى
إياد:لا اصلى عندى مشوار
سهر: يعنى هتسبينى لوحدى
إياد:طيب انا هدخل اصحى لك مصطفى
سهر:لا خليه نايم …انا وانت ماقعدناش مع بعض من زمان
• علياء لبست وراحت لإياد ولما قربت من اليخت شافت فيروز دخله اليخت بس مالحقتش تكلمها
فيروز دخلت على إياد وشافت سهر وهى بتحضنه
فيروز :ايه اللى انا شايفه ده …مين دى
إياد: ماما …؟….لا انتى فهمتى غلط
فيروز :انت كل يوم مع بنت ولا ايه ……..انا من زمان شاكه انك بتعمل حاجه غلط بس كنت بكدب نفسى
إياد:انا ماعملتش حاجه غلط
فيروز : لما قولتى انك بتحب بنت قولت الحمد لله اخلاقه هتتحسن بس متوقعتش انك تكون بتخدعنى وتخدعها كمان
إياد: ياماما سهر دى تبع مصطفى
فيروز:طيب وانك كدبت عليا قولت انك بتروح الجامعه وانك طالب مجتهد والحقيقى انك كدبت على البنات وقولتهم انى عيانه علشان تخليهم يساعدوك…من يومين تقولى انا بحب علياء ودلوقتى اشوفك مع غيرها ..حتى علياء البنت الغلبانة دى بتكدب عليها..بس انا ممكن اتوقع ايه من واحد ادعى على مامته المرض انا مش مصدقة انك ابنى
إياد:اسمعينى بقى ياماما انتى طول عمرك شاكه فى لدرجة انى انا نفسى بداءت اشك فى نف…
علياء تدخل عليهم
إياد: علياء…؟
علياء: ايو وانا سمعت كل حاجه ………
——————————————
ياترى ايه اللى هيحصل هنعرف فى الحلقه اللى جايه استنونا بكره

Mohamed Uonis

أعمل كمختص محركات بحث للموقع، والملك الاصلي واقوم بمتابعة كافة الالتزامات الخاصة بمؤلفي القصص

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى