قصص جنقصص مضحكة

أنا أللي هخرج العفريت قصة رعب حقيقية من مصر

قصص باللهجة المصرية بقلم منى حارس

هو ليه الإنسان بيدخل في حجات ملهوش دخل فيها ، بيحاول يجرب كل حاجة جديدة من غير ميفهم هل الحاجة دى هتضره ولا لا ، ليه الانسان فضولي في حد ذاته ، وبيحب يدخل في اللي ملهوش فيه اصلا ، انهاردة قصة صديقنا محمود من مصر حاول يعمل نفسه بيفهم في اخراج الجن والعفاريت ، ويعمل نفسه شجاع بس النهاية كانت انه اضرب ضربه لغاية مكان هيموت فيها ، اقدم لكم اليوم قصة في موقع قصص واقعية بعنوان أنا أللي هخرج العفريت قصة رعب حقيقية باللهجة المصرية .

 

أنا أللي هخرج العفريت قصة رعب حقيقية من مصر

 

اسمي محمود المصري ، عندي خمسه وتلاتين سنه من مصر ، حكايتي غريبة اووى بس للاسف الشديد حصلت ، وكل دا بسبب جناني وحبي اني أجرب كل حاجة جديدة وغريبة ، عارف انى مجنون واستاهل اللي حصلي في النهاية ،  من تلت سنين طلعت في  دماغي  اشتغل راقي ومعالج لحالات المس والسحر من الجن ،  واحد صاحبي اسمه الشيخ عرفه حضرت معاه كام جلسه كدة حب استطلاع ،  كنت بشوف حاجات تشيب الشعر  وتلاعب ، بس  للاسف حبيت الموضوع وحسيت انه نوع من انواع المغامرات وانا بطبعي بحب اغامر ومجنون .

 

المهم هما كام جلسه واتعلمت شوية حاجات جمدوا قلبي شوية ،  وفكرت اني بقيت معالج  وكدة واني خلاص ، وروحت عامل ايه بقى  قولت قدام الناس فى الشارع بتاعنا وقرايبنا والجيران اني بعالج من الجن واني راقي ، بعد يومين اتصل بيا جار ليا وقالي الحقني ياشيخ  محمود ، رديت عليه قولتله : خير يا حج مالك ؟

رد وقال بفزع : اخويا  يا شيخ محمود عمال يكسر في البيت ويطلع اصوات غريبه جدا وبيهددنا باصوات غريبة اووى ،  ومش قادرين عليه وبيقول هيموت نفسه وهيموتنا قبلها الحقنا ابوس ايدك يا شيخ، انت  مش قولت انك بتعالج  المس والسحر تعالي بسرعة الله يباركلك يا شيخ ، قولتله حاضر هاجي بسرعة يا حج متقلقش ، كنت فرحان اووى اني رايح لحاله لوحدي كنت خايف مش هنكر لأنها أول مره ، لوحدي بس  قولت اتغلب على خوفي واجمد قلبي .

 

دخلت الشقة كان التلفزيون متكسر على الارض ،  وناس قاعدة  في صالة البيت وكل الناس مستنين البطل المغوار اللي جاي ينقذهم ، اللي هو العبد لله انا ، الاوضه  اللي كان فيها الشاب الهايج الممسوس ،  وكان عمال يخبط جامد في الباب بطريقة جامده  ومقرفة ، ويقول كلام غريب جدا  و يشتم بألفاظ وحشة ويهدد انه هيقتل الجميع ، هكذب عليكم انا  دخلت ورجلي بترتعش جامد ،  وقولت بصوت مهزوز بحاول يكون واثق من نفسه ،  ماتقلقوش بس فهموني هو عمل حاجه غلط او رمي ميه سخنه اوصرخ في  الحمام او اي حاجه من الحجات دي ، ردوا وقالوا: لا ابدا هو مرة واحدة لقيناه بالشكل دا.

 

قولتلهم  بصوت مرعوب بحاول يكون كويس  وطبيبعي طيب ماتقلقوش يا جماعة ،  ساعة وكل  حاجة هتخلص ان شاء الله ، محتاج بس تلاته  يدخلوا  يمسكوه معايا ، كلهم خافوا يقربوا لما دخلت الاوضة عرفت هما خافوا ليه لانه كان عامل زى العجل ضخم كدة وجته ، اخوه  جه معايا بالعافية الصراحة ورجل بتحدف لورا ورجل لقدام ، قولت في سري  : انا هعمل زي الشيخ عرفان  وخلاص ، هرسم دايره و هاقرأ آيات قرانيه  هتخلي الجن  يبعد عني ويخاف ويتحرق ، والجن اول ما هيشوفني مش هيقدر يقربلي ، كان في ناس كتير قاعدة  ودا في  حد ذاته احلي دعاية .

 

دخلت الاوضة  وأنا بحاول يكون عندى ثقه ومفكر نفسي ابوزيد الهلالي ، أول مادخلت الاوضة كانت الحالة رافعة لوح خشب لفوق وهيحدفه عليا  ،  ببص ورايا لاقيت اخوه جري الجبان،   وقفل  باب الاوضه عليا انا والحالة الملبوسة  لوحدينا، انا شوفت المنظر كان هيجيلي سكته قلبيه وربنا من الرعب ، اصل الرجل كان عينه حمرا زى الدم ، مسكت نفسي وقولتله بصوت عالي  ارجع لأحرقك بالنار ، بصلي بغضب وبسرعة رسمت  الدايره  .

ولسه هقرأ واقول الايات ،  القران لاقيته داخل عليا بلوح الخشب على راسي  نسيت كل القرءان ال انا حافظه وفضلت اقوله ارجع لاحرقك ، مردش عليا نزل فيا ضرب بالعصاية ،  لغاية مكسر لوح الخشب  وحشرنى فى الدولاب اللي في الاوضة ، فضلت اصرخ بأعلي صوتي  وانا بموت ، ونبى افتحولى انا غلطان انا مبعرفش حاجة اصلا .

ولا حد عبرنى بكلمه كله كان خايف ، وانا اقول : ارجع لاحرقك ولا حد رجع يلحقني  وينجدني منه وفضل يضرب فيا بايده ورجله بكل قوته اخدت فعلا  علقه موت ، وبعدين اعد يضرب كتفي ، مش فاكر بلعدها حاجة للامانه بس شكلي اغمى عليا من كتر الضرب ،  وفتحت عيني  لقين نفسي في المستشفي ايدي الاتنين ورجلي الشمال متجبسين ، ولوح الخشب متجبس معايا وكدمات في جسمي كله .

وعرفت هناك انهم لحقوني ، والرجل طلع  شارب مخدرات و واخد حبوب مخدرات ،  بتخليها يقفد الاحساس ويتجنن وانا اللي كنت برسمله دايره وبقوله ارجع لاحرقك وانا زي الغبي مش فاهم حاجة ، والحمد لله من بعد ماخفيت  بعد ست شهور في الجبس وعمليات تركيب شرايح ، الشارع بتاعهم  دا استحالة ادخله ونقلت لمنطقة تانية ، وقطعت علاقتي بالشيخ عرفان اصلا الله يحرقه وانا لا هعمل مغامرات ولا زفت وانا مالي انا ومال الجن والسحر والمس .

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق